Lögmannshlíð
Lögmannshlíð er hjúkrunarheimili að Vestursíðu 9 í Glerárhverfi sem tekið var í notkun árið 2012. Lögmannshlíð er fyrsta hjúkrunarheimilið á Íslandi sem hannað er í anda Eden hugmyndafræðinnar og umgjörð heimilisins styður við og styrkir aukin lífsgæði íbúa sem þar búa.
Um Lögmannshlíð
Lögmannshlíð samanstendur af fimm 9 manna heimilum sem öll eru eins sett upp: Árgerði, Bandagerði, Kollugerði, Melgerði og Sandgerði.
Á hverju heimili er afar gott einkarými eða 36 fermetra íbúð með stórri og góðri snyrtingu og góðri aðstöðu fyrir nauðsynleg hjálpartæki. Sér útiaðstaða fylgir hverri íbúð.
Þegar íbúar fara út úr íbúðum sínum koma þeir beint í sameiginlega stofu, borðstofu og eldhús. Innangengt er af öllum heimilunum í miðrými. Þar er samkomusalur, félagsstarf, iðjuþjálfun, sjúkraþjálfun, hár- og fótsnyrting o.fl. Einnig er mjög góð sameiginleg aðstaða í útigörðum bæði inn á milli húsa og í kringum húsin. Heimilið er í grónu hverfi, allt á einni hæð með góðu aðgengi út.
Í Lögmannshlíð er lögð áhersla á hlýlegt umhverfi og að heimilisfólk hafi persónulega muni með sér, til þess að gera umhverfið notalegra og eins heimilislegt og hægt er.
Náin samvinna milli íbúa, fjölskyldu og starfsfólks er höfð að leiðarljósi við alla umönnun. Heimsóknir aðstandenda stytta daginn, veita styrk og efla fjölskyldutengslin. Aðstandendur eru alltaf velkomnir og er þátttaka og afskipti þeirra vel þegin.
Hafa samband
Hafðu samband ef þú ert með fyrirspurn eða óskar nánari upplýsinga um þjónustuna